புதுச்சேரி, அக். 17: உழைப்பின் மேன்மையையும் கல்வி, அறிவு, ஞானம் ஆகியவற்றின் சிறப்பையும் எடுத்துரைக்கும் ஆயுத பூஜை மற்றும் சரஸ்வதி பூஜை திருநாளை முன்னிட்டு, புதுச்சேரி முதலமைச்சர் ந. ரங்கசாமி பொதுமக்களுக்கு இனிய வாழ்த்துகளைத் தெரிவித்துள்ளார்.Welcome to Vanakam Pudhuvai weekly newspaper
அவர் வெளியிட்டுள்ள வாழ்த்துச் செய்தியில், அன்றாட வாழ்க்கை, தொழில் மற்றும் பணிகளில் பயன்படுத்தப்படும் கருவிகள், இயந்திரங்கள், வாகனங்கள் உள்ளிட்ட அனைத்து உபகரணங்களுக்கும் மதிப்பளித்து, உழைப்பின் மாண்பைப் போற்றும் திருநாளாக ஆயுத பூஜை திகழ்கிறது என்று குறிப்பிட்டுள்ளார்.
எந்தவொரு பணியிலும் அர்ப்பணிப்பு, நேர்மை மற்றும் முழுமையான ஈடுபாட்டுடன் செயல்பட்டால் வெற்றியும் முன்னேற்றமும் நிச்சயம் கிடைக்கும் என்பதை ஆயுத பூஜை உணர்த்துவதாகவும் அவர் தெரிவித்துள்ளார்.
சரஸ்வதி பூஜை கல்வி, அறிவு, ஞானம், கலை மற்றும் படைப்பாற்றலின் பெருமையைப் போற்றும் புனிதமான நாள் என்றும், கல்வி தனிநபர் முன்னேற்றத்திற்கு மட்டுமின்றி சமூக மற்றும் நாட்டின் வளர்ச்சிக்கும் அடித்தளமாக விளங்குகிறது என்றும் முதலமைச்சர் தெரிவித்துள்ளார்.
மாணவர்கள் கல்வியில் சிறந்து விளங்கவும், ஆசிரியர்கள் தங்களது அரிய பணியைச் சிறப்பாகத் தொடரவும், இளைஞர்கள் அறிவையும் திறமையையும் வளர்த்துக்கொண்டு வாழ்வில் உயர்ந்த நிலையை அடையவும் இத்திருநாள் ஊக்கமளிக்கட்டும் என அவர் வாழ்த்தியுள்ளார்.
மேலும், “உழைப்பையும் அறிவையும் இரு கண்களாகக் கொண்டு” ஒவ்வொருவரும் தங்களது கடமைகளை அர்ப்பணிப்பு உணர்வுடனும் பொறுப்புடனும் நிறைவேற்ற வேண்டும் எனக் குறிப்பிட்டுள்ள அவர், இந்தத் திருநாட்கள் அனைவரது இல்லங்களிலும் மகிழ்ச்சி, மனநிறைவு, நம்பிக்கை, நலம் மற்றும் வளத்தை நிறைவாகக் கொண்டு வரட்டும் என்று தெரிவித்துள்ளார்.
அன்னை சரஸ்வதியின் அருளாசி அனைவருக்கும் கிடைக்கவும், உழைக்கும் கரங்களுக்கு வலிமையும், முயற்சிகளுக்கு வெற்றியும் கிடைக்கவும் வாழ்த்தி, அனைவருக்கும் தனது இனிய ஆயுத பூஜை மற்றும் சரஸ்வதி பூஜை நல்வாழ்த்துகளை மாண்புமிகு முதலமைச்சர் ந. ரங்கசாமி தெரிவித்துள்ளார்.
